Halli hallo aha oho
dr Kitu Rap dä goht ä so:
Hoi, sali zäme, grüezi mitenand,
mir mache eus jetzt mitenand bekannt....

So tönt’s jede Dunnstig zwoi mol in dr Stutz-Turnhalle,
das tuet de Chind und eus Leiter ganz guet gfalle.

Das Johr duet eus dr Rabe-Socke begleite
und eus dur sini Abentüür leite.

1 x 18 und 1 x 21 git 39 turnendi Chind,
do vergoht so ne Turn-Lektion mega gschwind.

Die erschti Gruppe chunt vo viertel ab drü bis viertel ab vier und turnt ä ganzi Stund,
au die zwoiti Gruppe vo halb foif bis halb sächs spörtlet, jo das isch gsund.

Mir möche Parcours, Fangis, Stafette, lerne die verschiedene Grät und no viel meh,
usser ämol bim ä Zämestoss, duet sich do drbi niemmer weh.

Sig’s Wiehnacht, Fasnacht, Ostere oder verschiedeni Johreszyte,
mir finde zu allem ä Themestund, und wenn mr als Cowboy uf em Pferd düend ryte.

Au d Pippi-Langstrumpf si mr scho go bsueche in dr Villa Kunterbunt
und in Planig isch ä mega tolli Eltere-Chinder-Stund.

Will mir nach J&S Kids Regle vom Bundesamt für Sport eusi Stunde düend gstalte,
müesse mir au immer wieder dusse uf em Platz und em Rase eusi Lektione halte,

Am nächste Turnerobe werde mir sicher wieder euses Beste geh,
au am Eierläset und em Schlussturne chasch eusi Chinderschar gseh,

als Highlight näme mir am Jugendturnfest teil und bestritte dr Kitu-Wettkampf,
d Chinder führe mir a und hoffe dä langi Tag sig nid ä z grosse Chrampf.

Vor de Summerferie merkt me, dass die einte scho Schuelryff wärde und s Kitu leider
gli müend verloh,
doch git’s denn wieder ä ganzi Schar wo vom Muki zu eus duet cho.

Alli Chinder chöme regelmässig und gärn, das freut eus sehr,
so si mir Leiter motiviert und d Lektione falle eus gar nid schwer.