Halli hallo aha oho

dr Kitu Rap dä goht ä so:

Hoi, sali zäme, guete Obe mitenand,

mir mache eus jetzt mitenand bekannt….

So tönt’s jede Dunnstig zwoi mol in dr Stutz-Turnhalle,

das tuet de Chind und eus Leiter ganz guet gfalle.

2 x 20 git 40 turnendi Chind

do vergoht so ne Turn-Lektion mega gschwind.

Die erschti Gruppe chunt vo halb vier bis halb foif und turnt ä ganzi Stund,

au die zwoiti Gruppe vo halb foif bis halb sächs spörtlet, ja das isch gsund.

Mir möche Parcours, Fangis, Stafette, lerne die verschiedene Grät und no viel meh,

usser ämol bim ä Zämestoss, duet sich do drbi niemmer weh.

Sig’s Wiehnacht, Fasnacht, Ostere oder verschiedeni Johreszyte,

mir finde zu allem ä Themestund, und wenn mr als Cowboy uf em Pferd düend ryte.

Au d Pippi-Langstrumpf si mr scho go bsueche in dr Villa Kunterbunt

und in Planig isch ä mega tolli Eltere-Chinder-Stund.

Will mir nach J&S Kids Regle vom Bundesamt für Sport eusi Stunde düend gstalte,

müesse mir au immer wieder dusse uf em Platz und em Rase eusi Lektione halte,

agleit hei mr Skiazug, Händsche und Chappe, will so viel Schnee isch gsi vorhande,

so sind ä tolli Schneeballschlacht und wunderschöni Schneemanne entstande.

Euses Kitu het am Turnerobe dr Film Madagascar uf dr Bühni zum Beste geh,

au am Eierläset und em Schlussturne chasch eusi Chinderschar gseh,

als Highlight näme mir z Maisprach am Jugendturnfest teil und bestritte dr Kitu-Wettkampf,

8 Chinder führe mir a und hoffe dä langi Tag sig nid ä z grosse Chrampf.

Langsam merkt me, dass die einte scho Schuelryff wärde und s Kitu leider gli müend verloh,

doch git’s denn wieder ä ganzi Schar wo vom Muki zu eus duet cho.

Alli Chinder chöme regelmässig und gärn, das freut eus sehr,

so si mir Leiter motiviert und d Lektione falle eus gar nid schwer.

Monika Eggimann & Sonja Furer